لقاء لكوادر "المستقبل" في طرابلس: مستمرون وجاهزون .. "وكل شي بوقته حلو"

*لقاء لكوادر "المستقبل" في طرابلس: مستمرون وجاهزون .. "وكل شي بوقته حلو"*

عُقد، اليوم الأحد، لقاء صباحي لكوادر "تيار المستقبل" في طرابلس، تخلله حوار مفتوح حول شؤون وشجون المدينة، وموقف التيار منها ودوره في الاستحقاقات المقبلة، في حضور عدد من أعضاء المكتبين السياسي والتنفيذي في الشمال وشخصيات وفعاليات.

وألقى عضو المكتب السياسي ناصر عدرة، خلال اللقاء، كلمة وجدانية وسياسية، جاء فيها:

"صباح الخير لكل هالوجوه الطيبة .. يلي منحبها وبتحبنا وعم نكمل معها هالمسيرة .. مسيرة الرئيس الشهيد رفيق الحريري .. مع الحبيب دولة الرئيس سعد الحريري.

مجتمعين اليوم .. تـ نتحاور ونحكي سوا عصوت عالي .. لأنه صوتنا بطرابلس مثل حيطنا .. كان ورح يضل "عالي" و"عالي".

طول ما نحنا مجموعين تحت راية "تيار المستقبل" بقيادة الرئيس سعد الحريري .. ما حدا بيقدر يلغينا أو يلغي وجودنا .. أو يطلع على كتافنا .. أو يفرقنا ويعتبر انه "انتهينا"!

نحنا مش أرقام بحسابات حدا .. نحنا أصل الحساب وفصله .. ونحنا ميزان طرابلس يلي عـ طول "طابش" مع الحق بوج كل مين عم يقول "كلام حق يراد به باطل"!

نحنا بـ"تيار المستقبل" منعرف بعض كتير منيح .. ومنعرف قيمة كل واحد فيكن وتضحياته .. لأنه ياما اشتغلنا سوا .. وركضنا سوا .. وتعبنا سوا .. تـ نحافظ على وجودنا .. ونربح أي معركة منفوت فيها .. ونحقق مصلحة مدينتنا يلي هيي .. بالنسبة النا .. فوق أي مصالح شخصية.

الرئيس سعد الحريري قلنا "كل شي بوقته حلو" .. يعني أول عآخر هالوقت رح يجي .. وما رح يصح إلا الصحيح .. ونحنا وانتو رح نضل .. رافعين راسنا .. واقفين حد بعض .. وبضهر بعض .. لأنه هيدي قضيتنا .. ولأنه نحنا أهل وفا.

ونحنا لما منقول وفا .. منعرف شو يعني وفا.

الوفا للرئيس الشهيد رفيق الحريري يلي دفع دمه كرمال كرامتنا .. ويلي علمنا انه السياسة هيي خدمة الناس .. مش التجارة فيهن .. وانه الناس أولاً ودائماً.

الوفا للرئيس سعد الحريري .. يلي ضحى كثير تـ يضل وفي لثوابت الرئيس الشهيد .. ويضل واقف وصابر بوج كل العواصف .. كرمال الناس أولاً .. ولبنان أولاً .. والعروبة أولاً.

الوفا لطرابلس الوفية .. ولكل أهلها يلي هني شهود على هالوفا .. وما ممكن يسمحوا لحدا .. مين ما كان يكون .. يستغل هالوفا ويبيع ويشتري فيه.

الله يقويكن .. و"كل شي بوقته حلو" .. بإذن الله".