ردت رنين الشعار ابنة المطرب عبد الكريم الشعار على الفنان مارسيل خليفة، بعد ظهوره في مقابلة إذاعية وحديثه عن حفله في مهرجانات بعلبك ٢٠٠٠، وتجاهله ذكر والدها الذي شاركه الحفل.
وكتبت رنين عبر حسابها الخاص على الفايسبوك، قصة حصلت معها على متن طائرة متجهة إلى عمان، التقت فيها بالصدفة مارسيل خليفة، وقالت إنه نصحها ان تبتعد عن والدها واصفا إياه بالحيوان المنقرض.
وكتبت رنين:
من يومين شفت مقابلة لفنان بيختار كلماته بعناية وبيحكي بخشوع وتنمّق؛ الأستاذ مارسيل خليفة. أعتقد إنه هيدي مش أول مرة بيحكي بحفلة بعلبك عام ٢٠٠٠ وما بيذكر فيها وجود والدي الكريم “عبد الكريم الشعار” بهالحفل.. دايماً بيستثنيه. ما بعرف إذا عن قصد أو سقط الموضوع سهواً لعدّة مرّات متكرّرة. بس أنا أرفقت هالنص بالصور بركي مترجع بتتنّشّط الذاكرة أستاذ مارسيل.
وتابعت رنين:
اللي بدي خبّركن يي هو هالحادثة اللي صارت من أربع سنين عالطيارة بجناح الفرست كلاس مع شخصه للأستاذ مارسيل خليفة! بالرغم من إنه ما كنت حابّة إحكي هالخبرية (أهلي قالولي عيب مش حلوة ومش أخلاقنا).
وروت كنت عالطيارة متّجهة لعمّان حيث التقت بالصدفة بخليفة وكتبت: لمحت الأستاذ مارسيل... ما بعرف بوقتها ليش استغرب إني عالفرست كلاس.. مع إنه المفروض أنا اللي إستغرب أنه الأستاذ مارسيل خليفة الشيوعي مسافر عالفرست كلاس... قعد جنبي طول الرحلة وصار يسألني أسئلة كتيرة أنا صراحةً استغربتها.. أغلبية هالأسئلة كانت “أدّيش قبضتي من برنامج أهل الطرب؟ عم يدفعولك منيح؟ أدّيش قبضتي من المشروع اللي رايحة كرماله بعمان؟
وتابعت رنين: الموضوع الأهم هو هالحوار اللي صار بيني وبين الأستاذ مارسيل لما صرنا عآخر الرحلة قبل الهبوط!
الأستاذ مارسيل: “مش لازم بقى تعملي شغل مع بيّك، لازم تلاقي شي لنفسك وخط لإلك وحدك... بيّك بيشبه “الحيوانات” اللي عم ينقرضوا وبيحطّوهن بقفاص وبيصيروا يطعموهن نتفة.. نتفة.
سكتت لفترة ثواني وكأنه انبلع لساني ما عدت أعرف شو قول.. للأسف مشكلتنا بعيلتي التهذيب الزايد والحيا الزايد وما كان عندي الجرأة إني رد متل ما لازم.. حطيت الهيدفون عراسي وبرمت وجي عالشباك وجسمي صار يرجف.. قام سألني “كيفا الماما؟ بعدها حلوة؟”
بلا ما إطلّع فيه جاوبته “الحمدالله منيحة”
.واكدت رنين انها عادت والتقت به وعاتبته على كلامه فقال “ما يكون عقلك زغير وتزعلي.. ما أصلاً كلنا “حيوانات”!
يلفت موقع Mustaqbal Web الإلكتروني إلى أنّه ليس مسؤولًا عن التعليقات التي ترده ويأمل من القرّاء الكرام الحفاظ على احترام الأصول واللياقات في التعبير.